වැල්ලවාය පැත්තට විනෝද චාරිකාවක් ගිය පිරිසක් වෙරි වෙලා ඒ පැත්තෙ මිනිසුන් දෙදෙනකුට පහර දීමට එරෙහිව ගැමියන් එකතුවෙලා ඒ විනෝද චාරිකා නඩයේ බීපු පිරිසට පහර දීලා බිම ඉන්දවලා පාසැල් වල දෙන විදිහේ සමාජ අපහාසයට ලක් වෙන ආකාරයේ දඬුවම් වගයක් දීලා ඔවුන්ගේ ඡායාරූප ෆේස්බුක් එකටත් දාලා තිබුණා.(ඒ පහරකෑ අයගෙන් හය දෙනෙක් විතර රෝහල්ගත කරල තියෙනවා). පසුගිය කාලයේදී මීට සමාන සිදුවීම් රැසක් මේ විදිහට විවිධ වැරදි කරපු මිනිස්සුන්ට ගැමියන් එකතුවෙලා ගම් පිටින් දඬුවම් දීම් ගැන වාර්තා වුණා. මේ වගේ ගැමියන් එකතු වෙලා වරදට අනුව ගැමියන්ට දැන නැන පමණින් සමාජ දඬුවම් කිරීම මගින් කියන්නේ ඒ රටට නීතියක් නැති බවයි. මේ විදියෙ නීතිය අතට ගත්තම පොලිසියට හසු කර ගත් අවස්ථාවන් පිළිබඳව වාර්තා වන්නේ නැති තරම්. ඒ කියන්නේ පොලිසියත් ඊට සහයෝගය දක්වනවා. අනිත් අතට ජනතාවට නීතිය අතට ගන්න පුළුවන් නම් ඒ රටට පාලකයෙක් අවශ්‍යද? කොහොමහරි මේ විදියට මේ මිනිසුන් සාමාන්‍යයෙන් සෑම වරදක්ම කරල අහුවෙන මිනිසුන්ට දඩුවම් දෙන්න යන්නේ නැහැ. ඔවුන් දඬුවම් දෙන්නේ සාමාන්‍යයෙන් තෝරාගත්ත වැරදි කීපයක් කරන අයට විතරයි. මේ තෝරා ගත්ත වැරදි මොනවාද?
එකක් ලිංගිකත්වයට අදාල සම්මතය හෝ නීතිය කැඩෙන වැරදියි. පසුගිය කාලයේ ටියුෂන් ගිය තරුණ යුවළක් අහුවෙලා කට්ටිය මේ වගේම දඩුවම් කියලා ඔවුන්ට සමාජ අපහාස කරලා වීඩියෝ පවා ෆේස්බුක් එකට දාලා ආතල් එකක් ගත්තා.
අනික වරප්‍රසාදිත දේපලක් අයිති අවස්ථාවන්වල. උදාහරණයකට වාහනයකට මිනිසෙක් යට වුනාම වැනි අවස්ථාවල වාහනයට පහර දී ගිනි තැබීමෙන්. වාහනයක් සාමාන්‍යයෙන් මෙවැනි ගැමියන් අතර තාමත් වරප්‍රසාදිත දෙපලක් විදිහට ගැනෙන්නෙ.
අනිත් අවස්ථාව බොහෝ විට නාගරික සංස්කෘතික ක්‍රියාකාරකම් හරහා විනෝද වෙන අවස්ථාවන්ට අදාලවයි. බීලා සින්දු කියන විනෝද ගමන් යන අවස්ථාවන් ආදියේ දී.
ඒ සෑම අවස්ථාවකම වගේ ඔවුන් දඬුවම් දෙන්නේ වැරදිකරුවාට දේපලක් ඇත්නම් එය පහරදී කුඩු කර විනාශ කරමින් වැරදිකරුවන් සමාජය ඉදිරියේ හැකි තරම් අපකීර්තියට සහ නින්දාවට ලක් වන ක්‍රමයකටයි.ඒ වගේම සිද්ධිය වෙන්නේ ගමක නම් එම වැරදිකරුවා බොහෝ විට පිටගංකාරයෙක්. ඔබ හොඳින් නිරීක්ෂණය කළොත්, විශේෂයෙන් මේ ජනකොටසගේම පත්ති සමාජ පසුබිමින් එන විශ්වවිද්‍යාල ශිෂ්‍යයින් ද රැග් ලෙස කරන ක්‍රියාකාරකම් වල ද මීට සමාන ලක්ෂණ දකින්න පුළුවන්.
මේ ජනතාවට වැරදි කරන්නන් හොයා ගන්න අවශ්‍ය නම් ඔවුන්ගේම ම ගමේ ඇතුළු අති විශාල තොගයක් වැරදිකරුවන් වැරදි කරන බව ඔවුන් දන්නවා.
මේ ගැමියන් පන්තිමය වශයෙන් බොහෝවිට වැටෙන්නේ පහළ මැද පංතික සමාජ පසුබිමටයි. මේ තමයි මේ රටේ වඩාම සංස්කෘතික සමාජ සහ ආර්ථික ඛාදනයට ලක්වූ ජන කොටස. ඔබට සමාජය තේරුම් ගැනීමට අවශ්‍ය නම් වැරදිකරුවා පමණක් නොව ඊට ප්‍රතිචාර දක්වන්නා ද කියවන්න උත්සාහ කරන්න.
ලිව්වෙ - ධනන්ජය කරුනාරත්න
Comments
Post a Comment